ටීච

ටීච ටීච මං ආවා ගුඩ් මෝර්නිං
සෙල්ලං කරල එන්නද මං ටිකක් ගිහිං
පළවෙනි පාඩම මට හොදටම පාඩං
සදුදා එන්නෙ ටීචට මං තෑගි අරං

හොර්ම් වර්ක් දෙනවා ඉවරයක් නැතී 
දවස් ගානෙ පාඩං ගන්නවත් වැඞී
දවසට ගණන් දහයක් දොළහක්ම දෙතී
ටීච එක්ක බෑ අයියෝ එපා වෙතී

අලූත් ටීච පට්ට කෑල්ලක් වාගේ
අදින සාරි හරියට ගිනි කිකිළි වගේ
සිරියාවන්ත මුහුණකි පුන් ස`දක් වගේ
උගන්නන ඒවා කිරි කජු කනවා වගේ

නොකලොත් ගෙදර වැඩ මළ යක්ෂයෙක් වැහෙයි
නොමනා විහිලූවක් ඇහුනොත් උඩ එල්ලයි
හොර ලව් එකක් අහු උනොතින් බෙල්ල කඩයි
පොඩි වරදක් උනොත් ටීචට නට් තදවෙයි

වයසක උන්දැ එනවා පොත් ගොඩක් අතේ
ඊයේ කියපු ඒවත් අද මතක නැතේ
කියවන් යනවා ඔක්කොම ටික තියන පොතේ
පුටුව උඩ ඉදන් කිරනව නිදිත් මතේ

ටීචගෙ සාරි පොට මුළු ලෝකයක් විය
සෙක්සි ටීච කාගෙත් හීනයක් විය
කට සැර නාකි ටීචල ටික අපෝ විය
ටීචල හින්ද ගොඩ ගිය හැටි මතක් විය


  

ඉංග‍්‍රිස්

බිගිනින් එක ගත්තෙ පෙර පාසල් යන්ට
සන්,එග්,බන් ලිව්වෙ ආයනු පරදන්ට
ජිංගල් බෙල් කිව්වෙ ” ඕහ් ගුඞ්” අහගන්ට
ඉංග‍්‍රිස් ඉගෙන ගත්තේ ලොව ජය ගන්ට

ඒ බී සී අකුරු උඩ කඩ ඉරි ඇන්දෝ
බ්ලූ, රෙඞ් නම් වලට රවුමක් පාට කළෝ
ගුඞ් මෝර්නිං,සොරි කියන්න පුරුදු වුනෝ
වර්ක් බුක් එකේ වැඩ ටික ඉවර කළෝ

ශිෂ්‍යත්වෙට  ඕනෙ වචන බොහොම ටිකයි
එක්කො සිංහලෙන් වචනය ලියන්ට දෙයි
නැත්තං ඉංග‍්‍රිස් වලින්ම ලියන්ට වෙයි
ඔය ඩිංගක් දැනගත්තම හොදට මැදැයි

ඉංග‍්‍රිස් ටීච එන්නේ ඉදලා හිටලා
ආවත් පීරියඞ් ටික ස්කිප් කොරලා
අනිත් සබ් වලින් ගොඩ ගියොතින් හිතලා
විභාගෙ ලිව්වෙ ඉංග‍්‍රිස් අමතක කරලා

ඉංග‍්‍රිස් ටිකක් ගොඩ දාගන්නට හිතහං
ඉංග‍්‍රිස් පොතක් පත්තරයක්වත් බලපං

ඉංග‍්‍රිස් නිවුස් යනකොට ඩිංගක් අහපං
ඉංග‍්‍රිස් බැරුව මේ අම්මව පච කරහං

පර සුද්දන්ගෙ භාසාවක් යැයි කියතී
සිංහල මව් බසයි නිතරම කියාගතීී
උගන්නපු ගුරුන්හට දෙස් දෙවොල් දෙතී
ඉගනුම් ක‍්‍රමේ වැරදියි හිත හදාගතී

පැලියාව

හැමදේටම වැඩියෙන් බුද්ධිය තියුණු
ගුරුවරුන්ගෙ ආලය හැමදා රැදුණු
ගිය පාරත් පංතියෙ පළවෙනිය වුණු
මට වැඩියෙන් තියෙනව ඒකිට ලකුණු

කොණ්ඩෙත් හරි දිගයි ලස්සන දත් දෙපළ
තද කලූ පාට වටකුරු වූ ඇස් යුගල
හිතාගෙන ඉන්නෙ ඒකියි  පොෂ් කෙල්ල
ලස්සන වෙලා  ඕකිව  කරනව මෙල්ල

සතියෙන් සතිය ගන්නව අලූතින් සාරී
ඉන්නේ ඇදුම් පුරවාගෙන අල්මාරී
එන එන මෝස්තර ගන්නට ලක්කාරී
ඕකිට කොහෙන් දෑ  ඕවට වෙර වීරී

අරකිගෙ boyfriend හරි ස්මාට් වෙතී
අලූතින් ගත්ත කාර් එකකි සුදු පැහැතී
තට්ටු දෙකේ ලොකු ගේකුත් වෙන්ට ඇතී
හැමදාමත් ඔවුන්ට ඇති අපිට නැතී

පරසිද්ධිය ගන්න තමයි දැගලිල්ල
පොදු වැඩ කරන්නේ ගන්නට විමසිල්ල
හිත හොද පෙන්නමින් කරනව නැලවිල්ල
අම්මප ඉතින් උන්ටම වෙයි සැලකිල්ල

තමන්ට වැඩිය උන්ගේ ඇති හැකියාව 
ඉවසන්නට බැහැ මුහුණේ සිරියාව
ඉරිසියාව පරදනවා රුසියාව
මොකදෑ අප්ප ඔය හැටි ඔය පැලියාව

බහ තෝරපු මව් හීනය

බෝණික්කන් අතින් පයින් එල්ලගෙන
මේසරෙද්ද සාරියකට පටලගෙන
බේත් කුප්පි බඩු මල්ලට දමාගෙන
වැඩ ඩිංගිත්ත අම්මෙක් මං හිතාගෙන

හුනු කූරට පාට වෙච්චි දෑත් පොඩි
ගුටි කෑමට පුරුදු වෙච්චි ගසකි පොඩි
චූටි ඇගට කැරකවෙච්චි ඔසරි පොඩි
ටීච වෙන්න කැමති වෙච්චි දෝණි පොඩි

ප්ලාස්ටික් නලාවකි කර වටකරගත්
අම්ම අප්ප නංගි මල්ලි ලෙඩ කරගත්
බෙහෙත් තුන්ඩු පොඞ්ඩි ලියයි හතිදාගත්
ඩොක්ටර් කෙනෙක් වෙන්ට කැමති දුව කොහොමත්

තව ටික දිනක් වෙයි ශිෂ්‍යත්වෙට ඇත්තේ
මම ගැන ලියන හැම රචනාවක ඇත්තේ
අන්තිමටයි හදුනාගන්නට ඇත්තේ
හොද පුරවැසියෙකු වීමයි දැන් මට ඇත්තේ

විභාග ලියන එකනම් හරි එපාවෙතී
අනෙක් හමදේම කැපකර ගන්ට වෙතී
දුක් විදිනවා අවුරුදු දින මාස සතී
යන්තං ටිකක් පාස් උනොත් මටත් ඇතී

අහසට මැවූ හීනවලට කෙලවෙච්චි
නලා හුණු කූරු එළියට විසි වෙච්චි
හරි කාලෙට මගුලක් නම් පැටලිච්චි
බහ තෝරපු මව් හීනය එලිවෙච්චි

නළු පාලනේ

දමා මේකප් සුදු මුහුණකට
දේශපාලන කියන රැල්ලට
පේ‍්‍රක්ෂක දුක් නිවා දමනට
උඩගු නළු නිළි බහී පහළට

නිරන්තර ලැබෙයි මිනිසුන්ගේ ආලේ
හරකුන් ලෙසින් උන් ඉන්නව ඇති ගාලේ
ආදරයයි මේ බලයයි ඇති වේලේ
මේක තමයි ඡන්දෙ ගන්න හොද කාලේ

අකමැත්තෙන් උනත් මම ආවා ඔන්න
මට  ඕනෙනෑ ලොකු බලයක් අරගන්න
මෙතුමාගෙත් දෑත ශක්තිමත් වෙන්න
ආසයි තැනක් අරගෙන පිහිටක් දෙන්න

ඇත්තට අනේ මම දන්නේ නෑ  ඕවා
උගත් මොකට කරන්න මහජන සේවා
ඇට‍්‍රෑක්ටිව් හැර වෙන කුමටද ඒවා
මම දන්නව කියන්ට නම් ජය වේවා

රගපාලා බෑ ඔයාට ලං වෙන්නට
මගේ හිතේ ඇති දේවල් කියවන්ට
මගෙ දැනුමෙන් අමතනවා අහගන්ට
විසි තුන් වෙනිද හවසට කොළඹට එන්ට

මේකෙ ඉදලා නෑ තව මට හරියන්නේ
කලර් එකත් නෑ හරියට මැච් වෙන්නේ
ඔබලා ගැන හිතන්න මම සැරසෙන්නේ
කොළඹට නෙවෙයි නුවරට හෙට මම එන්නෙ

බීච් එක

ආදරේ කරන්න වෙන්නෙ ටික දිනකින්
ඒකට යන්න තැනකුත් නෑ හරිහාමන්
කට්ට අව්වෙ වේලීගෙන කුඬේ යටින්
පටන් ගනියි පෙම් කරන්න ඔන්න ඉතිං

මහත්තයෝ සාස්තරේ අහනවද
කරන වැඩක් හරි යන්නෙත් නෑ නේද
මහත්තයට නෝන ටිකක් සැර වැඩිද
මෙන්න මෙහෙට අත පොඞ්ඩක් දෙනවාද

කපපු අන්නාසි මිරිසුයි ලුණු දාපු
වෙරළු අච්චාරු පදමට තම්බාපු
කඩල තියනවා කට ගැස්මට හදපු
මෙන්න නෝන කන්නට නං පංකාදු

ෆාමසියෙන් බෙහෙතක් තියනවා ගන්ට
දවස් ගාණකින් නෑ කෑමක් කන්ට
ඔබ දෙපළට පිං ඩිංගක් සිදුවෙන්ට
අනේ මහත්තයො කීයක් හරි දෙන්ට

කරදර නම් ඉවරයි හොදටෝම ඇතී
එන්නකො ළගට දැං ආපහු යන්ට වෙතී
අනෙ අංකල් බෝලේ යැයි කියාගතී
පොඩි කොල්ලෙක් ආවයි දාගෙනම හතී

පෙම් කරන්න තියෙන්නෙ මේ බීච් එකේ
ඉදගන්ටවත් දෙන්නේ නෑ පාක් එකේ
පොඞ්ඩක් නිදහසේ ඉන්නට තියන එකේ
කරදර නොකර ඉදපං මේ ඉන්න එකේ

දානපති

දුප්පත් වෙලා මම හිටියා ඒ කාලේ
මම විතරයි දන්නෙ මම දුක්විදි තාලේ
ලබා ගත්ත දේකින් දෙනවා දානේ
පිං කරගන්න මම කැමතියි මේ කාලේ

ඕනෑ කීයක්ද නෑ මට එය ලොකු ගානක්
කෙරෙන්ට තියෙන්නේ මොනවද වගකීමක්
පුතාට තියනවා යන්නට දුර ගමනක්
මම වෙනවා ඒ ගමනේ හෙවනැල්ලක්

අද නම් මට වැඩ ඩිංගක් වැඩි වාගෙයි
බැංකු යන්න වෙලාවකුත් නැති පාටයි
ෆෝන් එකත් ගන්න බැරි උනේ ඒකයි
පුලුවන් හැටියෙ පුතාට මං ගෙවනවමයි

අනේ ඉතිං මොකටද මට මගෙ සිහිය
ඩිංගක් වත් මතක නැතුව ගිය විදිය
පුතා ඉතිං කෝල් කලෙත් නෑ වැඩිය
මගෙ පස්සෙන් හිටියා හොදටම මදිය

සුගත් ලමය යනවා දොස්තර වෙන්ට
අප්පට උන්ගෙ බෑ මොකොවත් කොරගන්ට
පස්සෙන් ඉදල උදව් පදව් නොකරන්ට
මම නැත්තං යයි ඔය වගෙ තත්වෙකට

ලොකුකම පෙන්නන්න පුරසාරම් දෙසතී 
පැෂන් එකට ඉස්සර දුප්පත් කියතී
නැති එවුන්ට පිහිට වෙන්න ට‍්‍රයි කරතී
කල කිසිදෙයක් නැතුවට හරි දානපතී

බස් ගමන

දවසක් දා ගමනක් යන්න හිතාගෙන
බඩු මල්ලත් ලක ලෑස්ති කොරාගෙන
සෙනග පිරී උතුරා යන බස් එකට 
නැග්ගයි ඔන්න පළවෙනියට මුණ ගැහුුණ

වැටෙන් නැතුව අල්ල ගන්න හිතාගෙන
බඩු මල්ලත් අතකට හිර කොරාගෙන
අමාරුවෙන් ඉස්සරහට ඇදෙන කොට
රුව්වයි මට විලාසෙකට ගිලගන්න 

මුළු ජිීවිතේ ගත කරන්න හිතාගෙන
ළග ඉන්න උන් යට කරගෙන මරාගෙන
හදිස්සියේ හිස් උන එක් අසුනකට
පොරකයි වෙහෙස වෙයි ටිකකට ඉදගන්න

බස් එක ලෝඞ් නේ කොහොමත් හිතාගෙන
ලග උන් අයට විදියක් නෑ තේරෙන්න
පිරිමින් වට පිටේ ඉන්නා ගෑනුන්ට
ට‍්‍රයි එක දමයි කිටි කිටියට ලං වෙන්න

ඉඩ ඩිංගක් දෙයි මට යැයි හිතාගෙන
වට පිට බල බලා අසුනක් සොයාගෙන
වියපත් ඈයො අපහසුවෙන් ඉන්න විට
වැටි වැටි නිදයි වෙන හින්දා ඉඩ දෙන්න

අනේ ඉතින් ගමනක් යන්න හිතාගෙන
බස් එක ඇතුලෙ වුනු ජරමර බලාගෙන
හිතෙන් බැන බැන බැනා නැගගත් ගොන් කමට
බැස්සයි බස් එකෙන් බාගෙට මැරීගෙන

අනාගතේ වෙන එව්වා

ග‍්‍රහයෝ කැරකෙන ඒවා
අල්්ලේ පිහිටන රේඛා
ඉස්සරහට  වෙන එව්වා 
කොහොම කියනවද මන්දා

නාඩි වැකිය අනාගතේ කියනවලු
ඇගිලි සලකුණෙන් හරියට දැනෙනවලු
එතන ගුරා හරි ශිල්පය දන්නවලු
ටික දෙනෙකුට ඔප්පු කරල තියනවලු

මේ තියෙන්නෙ අපූරුවට කොටුවල පිහිටපු ග‍්‍රහයා
දැන් ඉන්නා කෙනා නෙවෙයි ඔබේ අනාගත සැමියා
තුනි වෙනි කොටුවේ හැටියට හරියන්නේ තුන්වෙනියා
අත ඇරලා දාල  ඕක හොයා ගනින්  ඔබෙ හිමියා

හදහන් වල කොටු ගැන ගැන ග‍්‍රහයො එක්ක ඔට්ටු වෙන්න
අත බලවා රේඛාවල යන පාරක් හොයා ගන්න
තැන් තැන් වල අපි යනවා අනාගතේ බලාගන්න
තාක්ෂණේ දියුණු වෙච්ච ලෝකයකින් ජය ලබන්න

ඉස්සරහක් හොයා ගන්න අපි මොකටද දුවන්නේ
ඔව්ව පස්සෙ දිව්ව කාලෙ අපරාදේ හිතෙන්නේ 
දැං හරියට වැඩ  තියනවා කාලය හරි වටින්නේ
හදහන් අත් බලාගන්න එෆ් බී වෙබ් තියෙන්නේ

පොෂ් හීන

ටීවි එකේ දාන තැනක ගිහිිල්ල කන්න
කොණ්ඩෙ ටිකක් වෙනස් කරල හැඩට අදින්න
බීච් එකක පාක් එකක විනෝද වෙන්න
අප ආසයි අපි පොෂ් වෙන හීන දකින්න

කේ එෆ් සී ගිහිල්ලා කන්නට කෑම
මැක්ඩොනල්ඞ් එකෙන්  ඕඩර් කරලා ගන්න
බර්ත් ඬේ වලට හැම් බර්ගර් දෙන්න
සල්ලි තියන කොට පොෂ් විදියට කන්න

කෑලි කෑලි කැපූ කොණ්ඩෙ කෙලින් කර
පැත්තට වෙන්න තඹ පාටින් පාට කර
ඔඩෙල් ෆැෂන් බග් කඩවල ෂොපින් කර
ෆැෂන් කරනවා හොද ජොබ් එකක් කර

දියතු උයනෙ චුට්ටක් ඇවිදින්න යමු
බීච් එකේ ඇනිවසරිය සෙට් කරමු
සෙල්ෆි ටිකක් ගහලා එෆ් බී දාමු
පෝසත් වෙලා ඇති වෙකනම් සතුටු වෙමු

ඇදිවත් පවා නැති උන් ලොව ඉන්නවද
කෑමට බත් පිඩක් නැති උන් තව ඇද්ද
සිනහව දකින්නට උන් පිං කර නැද්ද
ටික දෙනෙක්ගෙ හීන මොකට පොෂ් වෙත්ද 

ෆීලිං හැපී

විටක තෝට්ෆුල් ෆීලිං හැපී වෙතී
තවත් විටක ෆීලිං අප්සට් දැනෙතී
හිතට දැනෙන හැගුම් වලට නම් දමතී
ෆීල් වන සැණින් සෙනිකව ටැග් කරතී

කොහෙද ඔයාගේ ගම පොඩි නංගියා
ඔයා කැමති මොන ජොබ් එකටද අයියා
ෆොටෝ එකක් එවන්නකෝ කිය කියා
අයියල නංගිලා මගුලක් ගනී හොයා

අම්ම අප්ප හොදට හැදූ මූණ කට
උල් කරගෙන ඇද කරගෙන විකාරෙට
ඇගිලි දෙකක් දික් කරගෙන උඩ අතට
රූප මවයි මුළු පිටුවක් පුරාවට

හරි ලස්සනයි අක්කි ඔයා ඩෙ‍්‍රස් එකට
පට්ට මැචින් කපල් එකට ඉන්න කොට
වාව් මාවලස් ඇක්ෂන් දානකොට
ඉවසුම් නෑ අලුත් කමෙන්ට්ස් දැනගන්ට


හිත නිදහස් වෙන්න පන්සල් පල්ලි යව
මගුලක්  ඕනෙ නම් කපුවෙක් හොයාගෙන
ලස්සන මූණ කටවල් ඇද නොකර ඉද
දැනුම  ඕනෙ නම් පොත්පත් කියෝපිය

ආලවන්ත කොල්ලෝ

ලස්සන හිත ගස්සන අය දැක්කාම
ලස්සන සිනිදු කළු කෙස් රැලි වැදුනාම
වටොර ඉග නිතඹ දෙස ඇස් නොහෙලාම
රූපය රස විදී එක කොල්ලෙක් එහෙම

වෙඩරු පිඩක් මෙන් හදවත උණු වෙනවා
අඩ අඩ හොටු පෙරාගෙන පස්සෙන් යනවා
මට වෙන කවුරුවත් නැති බව පෙන්වනවා
මම  හරි සෙන්සිටිව් කොල්ලෙක්  අගවනවා

කිසි වග තුගක් සතේට මායිම් නොකර
සෙට් වෙන කෙල්ල වචනෙට කරගෙන සොදුර
එක ලව් එකක් ඇත්තේ සතියට විතර
කොල්ලෙක් ඉන්නවා හරි සෙල්ලක්කාර

ලස්සන කැත මොකට මට වෙනසක්  ඕනෑ
පරම්පරාවම ගොඩ යන්නට  ඕනෑ
සිත ගත පිරෙන්නට දෑවැද්දක්  ඕනෑ
කොල්ලෙක් හිදී හොද බර අත්තක්  ඕනෑ

කිසි දවසක කොල්ලෙක් දෙස නොබලාපු
කනට ඇසෙන්නට වදනක් නොදොඩාපු
කිටි කිටියට කොටට ඇදුම් නොම ඇදපු
කොල්ලෙක් හොයයි කෙල්ලෙක් මලකින් ආපු

සිල්වත්

බෝ සෙවණේ සෙළවෙන කොට බෝපත්
නොකිලිටි සුදුවත් ඇදගෙන තැම්පත්
කුසල් ලබාගෙන වෙන්නට සිල්වත්
හැම දවසෙම පන්සල් යති පිංවත්

පුතේ ගෙදර වැඩිහිටියෙක් ඇති නේද
කැම්පස් ගියත් රස්සාවක් නෑ නේද
දැං බදින්න කොල්ලෙක්වත්  ඉන්නවද
ඕකට නොගියනං දැනටම ගොඩ නේද

තව ඩිංගක් ලොකු කරන්න කඩනව අපෙ විහාරගේ
පිනක් දමක් කොරගන්නට  ඕනෑ නෙව මේ කාලේ
මයෙ කනකර ආයිත්තම් පිනට දෙන්න උගස් කොලේ
නංගිලාගෙ කාසි පණම් පිනට ගන්න මං ආවේ

අනෙ අම්මප මුන්දලාගෙ තියන පව
පිිං කරගන්ට ඇති ගාණක් දෙන්නැතුව
පන් සීයක් දික් කරගෙන එනව තව
දෙවියන් බලා ගන්නව ඇති මේකුන්ව

රන් වන් පාටින් දළුලයි බෝධිය
මා පිං කර ඇත මට නැත ලෝදිය
මං තරමින් පිං කර නැති උදවිය
පව් වැඩි තරමට දිවියම කාපිය

ගෑනු අපිට

සුදු පුතාට නිල් පාටයි දෝණිට මේ රෝස පාට
මගෙ පුතාට මෙන්න කාර් දෝණි ආස බෝණික්කට
පුතා අඩන්නේ මොකටද ඒව උරුම දෝණිලාට
එපා එපා දග කරන්න රිදෙයි පුංචි මගෙ දෝණිට

ගස් නගින්න එපා දෝණි  ඕවා හොද නෑ ඔයාට
ඔය මොකට ද බයිසිකලේ  ඕක දෙනව ලොකු අයියට
රවුම් ගහන්නෑ කෙල්ලෝ යනව යන්න ගේ ඇතුළට
ගෑනු දැරිවියක් උනාම ඉන්න  ඕන ඒ තාලෙට
  
ආකාසෙම පියාඹනා කිරිල්ලියක් එපා වෙන්ට
අහළ පහළ සෙනග එක්ක වැඩි භජනෙට නොයා ඉන්ට
භය පක්සව ඉන්ට  ඕන තමන්ගේම ස්වාමියට
කතා හැදෙන්නට හොද නෑ දීග ආපු ගෑනියෙකුට

සියල්ලෝම මිනිස්සු වෙති වෙනසක් නෑ බුදු දහමට
ලොව ඉපදුන උත්තමයන් මව් කුසකින් බිහි උනාට
සිරි දළදා හාමුදුරුවො ලංකාවට වැඩමෙව්වට
ගෑනු නිසා පව් සිදුවෙයි නගින්න බෑ උඩ මළුවට                                                                                                                                                                                                                   

ෆිට් එක

සිංහල රට දෙන්නෙ මොකටද දෙමලුන්ට
එකම රටට තව භාසාවක් මොකට
ඉගැන්විය යුතුයි සිංහල මේකුන්ට
වැඩිය ආවොතින් දෙමු හොම්බෙන් යන්ට

වද පෙති දමා සිංහල වද කරන්නට
උන් වෙති තම්බි යනු හොද නෑ කඬේකට
සිංහල රටට තව එනවද රිංගන්ට
වැඩිය ආවොතින් දෙමු හොම්බෙන් යන්ට

මුත්තයියා මැච් ගහලා දිනනකොට
රුක්මණී ගේ සොදුරු රැගුම් බලනකොට
මොහිදින් බෙග් බුදු ගුණ ගී ගයන කොට
මොකද උනේ දෙමළ තම්බි නම් වලට

ජපන් ඉන්දියන් වාහන සරසාගෙන සිංහ ලෙයින්
අපිට එකක් තොපිට එකක් සගවාගෙන අමුතු ලයින්
රටට සාමෙ හිතට සානෙ පාදාගත නොහැකි හෙයින්
සිහල, දෙමළ, මුස්ලිම් ෆිට් විය යුතුවේ එකම ලෙයින්

මාර ලයින් 

අලුත බයික් එකක් ගත්ත කොල්ලන්ගේ
අලුත කසාදයක් බැන්ද කෙල්ලන්ගේ
අලුත් ජොබ් එකක් සෙට් වුන කට්ටියගේ
ලයින් නැගලා බහිනා හැටි හරිම අගේ

බයික් එකක් තියනව මට හරිම ගතී
අඩි දෙක තුනක් ඉහළින් මට යන්ට හැකී
මම වෙමි හැන්ඩි කොල්ලා යැයි සිතා සිටිී
ගහක තාප්පෙක ඇනුනම ලයින් බහී

අලුතින් බැන්දෙ මරු ම`ගුලක් අර ගතිමී
අලුත් නෑයො ගමේ ඈයො බලා සිටී
මම වෙමි අලුත් මනමාලී සිතා සිටී
දෙන්න තුන හතර වෙනකොට ලයින් බහී

මරු ජොබ් එකක් තියනව මට පට්ට පඞී
ගමේ හැච්ච සෙට් එකෙනුත් ඈත් වෙමි
පොෂ් විදියට ඉන්නෙමි මම සිතා සිටී
වැඩ වැඩි වෙලා කොර වෙනකොට ලයින් බහී

ගමේ ඉන්න අහළ පහළ නෑයන්ට
එකට කාලා වැටිලා සිටි මිතුරන්ට
පිහිට වෙන්න ල`ග ඉන්නා ඈයන්ට
අනේ ලයින් පෙන්නන්නේ මොනවාට

මයෙ  අම්මගෙ හැටි

අයියගෙ කාමරෙන් කුණු රෙදි පියඹනවා
කුස්සියෙ පි`ගන් බඩු කට කට වෙව්ලනවා
”අම්මප මුන්ට” කුටු කුටු ගා මිමිණෙනවා
අම්මට තරහ ගොස් ඇති බව වැටහෙනවා

ගෙදරට එන අමුත්තෙක් පිළි නොගත් විට
නෑයෙක් යන්න පෙර කෑමක් ලිහූ විට
යන නෑයෙකුට දණ නොනමා නොවැ`දි විට
ලොකු ඇස් දෙකක් එනවා කුස්සියේ සිට

වැඩ වැඩ කියා බුම්මාගෙන ඉන්නවද
කැම්පස් එකට ගොඩ වැදුනාවත් මදිද
ක්ලාස් නැති උනොත් ගෙදරින් යවනවද
අම්මගෙ ඇමතුමෙන් එන්නේ ඔය සද්ද

මොනවා උනත් ඒ මයෙ අම්මගෙ හැටිය
තේරුම් ගත්තෙ ගෙදරින් පිට සිට විටය
සැර වැර කරල හැදුවේ දුර් ගුණ ගතිය
වටහා ගන්ට ගත කල කාලය වැඩිය

ලෝකය ජය ගන්න  ඕනෑ තමයි පුතේ
ඒකට කලින් යහපත් විය යුතුව ඇතේ
කෙනෙක් කපා ජය ගැනීම වැඩක් නැතේ
කියු මයෙ අම්මා මතු බුදු වනවා නියතේ

මගේ කවි කම්

කවිකම් බැරිය සො`දුරු කවි පද අමුණන්න
යටි පෙළ අරුත් නැත එහි ගතු  කියවන්න
එළි වැට එළි සමය ඇත පොඞ්ඩක් වෙන්න
තුන පහ ලුණු මිරිස් පදමට දා ගන්න

මහ සමාජෙ පොඞ්ඩක් වත් කියවන්න
මටත් ටිකක් පුලුවන් බව දැනගන්න
කමෙන්ට් ලයික් ටික ටිකවත් වැඩිවෙන්න
අනේ යන ගමන් කවියක් කියවන්න

ම`ගුල් හීනය

බෝරිච්චිය දමා ඔසරිය ඇ`ද ගන්න
තුන් තැලි දමා නළලත හැඩ කර ගන්න
ඉර හද කොටා පෝරුවකුත් නග්ගන්න
ආසයි ම`ගුල උඩරට තාලෙට ගන්න

ගෙදර ඉඩ නොමැත ම`ගුලට සෙන`ග එතී
ඉවුම පිහුම බෑ කරදර වැඩක් වෙතී
මේකප් දමා ඩෙ‍්‍රස් වෙන්නට සැලොන් යතී
ම`ගුලට බියක් මගෙ ගත සිත වෙලා ගතී

ෆොටෝ ගහන්නට රුපියල් තිස් දහකි
ඒකට කලින් තව රූගත කිරීමකි
ලේටස්ට් ඔසරියට හැත්තෑ පන්දහකි
හැන්දෑ ගවුම මරු ගාණක් වෙන සෙයකි

උඩරට මනාලිය වෙන්නට සිතා සිටී
යටවෙන කාසි රුපියල් ගැන ලෝභ සිතී 
හදලා ලොකු කරපු දෙගුරුන් දෙපා වැටී
අත්සන් කරලා පැනලා යමි සිනා සිසී

කෙල්ලෝ

කොණ්ඩෙ කේ‍්‍රල් සුදු අයියෙක් දැක්කාම
හැඩට ඉන්න කලූ කොල්ලෙක් දැක්කාම
බයික් පදින ගති අයියෙක් දැක්කාම
හැරී බලයි කෙල්ලන් ඇස් ගස්සාම

සුදු, කලු, බයික් ඇති අයියල දකින නිතී
කෙල්ලන් කැමති උන් හා භජනයට වෙතී
චොක්ලට්,අයිස් ,මල් කොල්ලන් ගෙන් ලැබෙතී
ආලය නැගෙන විට හදවත කැවෙයි කිතී

කොල්ලන් අතර වීනස් දෙව් දුව වෙන්න
කැපිලා පේන තැනකට විත් ඉදගන්න
ටියුෂන් සර්ගෙන් පොඩි බැල්මක් ගන්න
කෙල්ලන් හදයි හැමවිට එක වී ඉන්න

කරදරයෙදි පොඩි අවුලෙදි දිවෙන සැණේ
ද`ග කෙල්ලන් වෙයි පන්තියේ ඈත කොනේ
වැදගත් යැයි කියන කෙල්ලන් ඇතත් පොතේ
හිත හො`ද කෙල්ලෝ පන්තියෙ අන්තිමයො නොවේ 

මා මළ දා

හ`දුනන කෙනෙක් ඇත ඔබ අප සැම දන්නේ
ඔබ අප සියලු දෙන මරු ලෙස හ`දුනන්නේ
කාටත් නොකිය හොර රහසෙම කැ`දවන්නේ
ඇරයුම් ලැබුනහොත් යන්නට සිදු වන්නේ

මා හට යන්න සිදු වන විට ඒ දිනට
සිදු කල යුතු සියලු දේ පවසමි මේ ලෙසට
අනවශ්‍යයි සිතමි ගෞරව මළ ක`දට
අණ බෙර ගසා නොකියනු මළ ගම රටට

නොදිරන දෙයක් පොලිතින් දින ගණන් සතී
සැරසිලි එපා ඉන් සිදුවන්නේ අගතී
නොතනනු තොරණ් ගෑවෙන්නට තරු පන්තී
සුදු කොත් දෙකක් දැම්මොත් හොදටෝම ඇතී

මා ලොව ඉපදුනේ නැකතක් ඇතිව නොවේ
මරු පැමිණියෙත් සුභ මොහොතක් බලා නොවේ

මළගේ වැඩපළට නැකතක් ඇයි ද ලොවේ
නොමැතිව නැකත් සිදු කල මැන කුසල් බලේ