පැලියාව

හැමදේටම වැඩියෙන් බුද්ධිය තියුණු
ගුරුවරුන්ගෙ ආලය හැමදා රැදුණු
ගිය පාරත් පංතියෙ පළවෙනිය වුණු
මට වැඩියෙන් තියෙනව ඒකිට ලකුණු

කොණ්ඩෙත් හරි දිගයි ලස්සන දත් දෙපළ
තද කලූ පාට වටකුරු වූ ඇස් යුගල
හිතාගෙන ඉන්නෙ ඒකියි  පොෂ් කෙල්ල
ලස්සන වෙලා  ඕකිව  කරනව මෙල්ල

සතියෙන් සතිය ගන්නව අලූතින් සාරී
ඉන්නේ ඇදුම් පුරවාගෙන අල්මාරී
එන එන මෝස්තර ගන්නට ලක්කාරී
ඕකිට කොහෙන් දෑ  ඕවට වෙර වීරී

අරකිගෙ boyfriend හරි ස්මාට් වෙතී
අලූතින් ගත්ත කාර් එකකි සුදු පැහැතී
තට්ටු දෙකේ ලොකු ගේකුත් වෙන්ට ඇතී
හැමදාමත් ඔවුන්ට ඇති අපිට නැතී

පරසිද්ධිය ගන්න තමයි දැගලිල්ල
පොදු වැඩ කරන්නේ ගන්නට විමසිල්ල
හිත හොද පෙන්නමින් කරනව නැලවිල්ල
අම්මප ඉතින් උන්ටම වෙයි සැලකිල්ල

තමන්ට වැඩිය උන්ගේ ඇති හැකියාව 
ඉවසන්නට බැහැ මුහුණේ සිරියාව
ඉරිසියාව පරදනවා රුසියාව
මොකදෑ අප්ප ඔය හැටි ඔය පැලියාව