ගෑනු අපිට

සුදු පුතාට නිල් පාටයි දෝණිට මේ රෝස පාට
මගෙ පුතාට මෙන්න කාර් දෝණි ආස බෝණික්කට
පුතා අඩන්නේ මොකටද ඒව උරුම දෝණිලාට
එපා එපා දග කරන්න රිදෙයි පුංචි මගෙ දෝණිට

ගස් නගින්න එපා දෝණි  ඕවා හොද නෑ ඔයාට
ඔය මොකට ද බයිසිකලේ  ඕක දෙනව ලොකු අයියට
රවුම් ගහන්නෑ කෙල්ලෝ යනව යන්න ගේ ඇතුළට
ගෑනු දැරිවියක් උනාම ඉන්න  ඕන ඒ තාලෙට
  
ආකාසෙම පියාඹනා කිරිල්ලියක් එපා වෙන්ට
අහළ පහළ සෙනග එක්ක වැඩි භජනෙට නොයා ඉන්ට
භය පක්සව ඉන්ට  ඕන තමන්ගේම ස්වාමියට
කතා හැදෙන්නට හොද නෑ දීග ආපු ගෑනියෙකුට

සියල්ලෝම මිනිස්සු වෙති වෙනසක් නෑ බුදු දහමට
ලොව ඉපදුන උත්තමයන් මව් කුසකින් බිහි උනාට
සිරි දළදා හාමුදුරුවො ලංකාවට වැඩමෙව්වට
ගෑනු නිසා පව් සිදුවෙයි නගින්න බෑ උඩ මළුවට